Цахим хөгжил инновац харилцаа холбооны сайд Ц.Баатархүү SpaceX компанийн Хөөргөлтийн үйлчилгээ хариуцсан менежер Эван Ферликийг хүлээн авч уулзлаа.
Уулзалтын эхэнд ноён Эван Ферлик Монгол Улс Үндэсний хиймэл дагуулаа хөөргөхөөр бэлтгэл ажлаа хангаж байдаг баяр хүргэж, SpaceX компанийн үйл ажиллагааг танилцуулж, АНУ-д айлчлах боломж тохиовол тус компаниар зочлохыг урив.
ЦХИХХ-ны сайд Ц.Баатархүү Монгол Улсын Засгийн газар 14 мега төсөл хэрэгжүүлэхээр төлөвлөсний нэг нь Үндэсний хиймэл дагуул гэдгийг дуулгаж, тун удахгүй УИХ-аар хэлэлцүүлэхээр бэлтгэл ажлаа хангаж буйг онцлов.
Монгол Улс Үндэсний хиймэл дагуултай болсноор:
- Харилцаа холбооны бие даасан системтэй болж, үндэсний аюулгүй байдлаа баталгаажууна.
- Монгол орны хаанаас ч интернэтэд холбогдох, мэдээллийн технологийн үйлчилгээг шууд авах боломж нээгдэнэ.
- 250 мянган малчин өрх E-Mongolia, E-сургууль, E-эмнэлэг гэх мэт төрийн үйлчилгээнүүдэд хамрагдах боломжтой болно.
- ААН, байгууллагуудын хэрэгцээ шаардлагыг хангасан үйлчилгээг нэвтрүүлж, бизнесийн үйл ажиллагааг дэмжинэ.
- Шилэн кабель шинээр татаж интернетийн үйлчилгээ үзүүлэх 29 их наяд төгрөг хэмнэнэ.
- 5G, IoT зэрэг шинэ технологиудын нэвтрэлтийг дэмжиж, аж үйлдвэр, хөдөө аж ахуйн салбарт эерэг нөлөө үзүүлнэ.
- Иргэдээ болзошгүй гамшиг, эрсдлээс сэргийлэх, авран хамгаалах боломж нэмэгдэх зэрэг олон талын ач холбогдолтой юм.
